اخيرا.... ربنا وفقني واشتريت طبنجه

[محمد جمال الشافعي]

المشاركة الأصلية كتبت بواسطة bodygard 34

الف مبروك على الستار بى.. شكلها بنت ناس ومتصانه ..اهم حاجه تكون راجعت الماسوره من جوه ..هى نسخه من الكولت 1911..طبنجه قويه جدا..تاّلف معاه ..شيلها فى ايدك فى البيت كتير من غير خزنه عشان تعتاد ايدك علي وزنها وحجمها ..فى الاول بس لحد ماتاخد عليها ..الحرص ثم الحرص ..الطبنجه بتتشال فى حته والخزنه والذخيره فى حته تانيه ..ومافيش صيانه الا بعد التأكد من خلو الماسوره من اى طلقه.. وربنا يكفيك شرها ..ملحوظه صغيره: انا ماشفتش سعر فى الموضوع

مساء الانوار ياحج محمد
الله يبارك في حضرتك ومتشكر جدااا علي نصايحك الغاليه وربنا يكفينا جميعا شر السلاح
انا راجعت الطبنجه علي قد معرفتي وللامانه كنت بقارن تاكل الاجزاء والماسوره مع طبنجه هكلر جديده كانت مع واحد صاحبي واحنا بنتفرج وده طبعا مع الفرق الرهيب بين الاتنين لكن لنقص الخبره ولان عيني مش متعوده علي الشكل الاصلي للاجزاء بدون تاكل فانا عملت فيها ناصح وقلت اقارن بالطريقه دي واعتقد ان حالتها معقوله من وجهه نظري المتواضعه جدا
الطبنجه دي كانت بتاعه لواء سابق توفي الي رحمه الله من ثلاث سنوات وله ابن فاضل بيشتغل مستشار وهو صديق لاخويا ولما عرف اني عايز سلاح عرض عليا اسلحه والده اللي من ضمنها المسدس السي زد اللي انا حاطه للتقييم في المنتدي وطبعا الاسلحه ماكانتش متسلمه هي كانت متغطيه بشحم ومتخزنه وربنا وفق وخلصت فيها في عشر دقايق
بالنسبه للسعر انا مارضيتش احطه علشان مش عارف ده متوافق مع قوانين المنتدي ولا لا لاني اشتريت مش ببيع بس طبعا طالما حضرتك سالت يبقي لازم اجاوب انا اخدتها ب 27 الف جنيه لان الناس عندها سماحه في البيع مش معقوله وزي ماقولت لحضرتك خلصت فيها في كلمتين