العودة   منتدى صيادين مصر > الصيد وانواعه والرحلات > الصيد البحري والنهري
 

 
 
إضافة رد
 
أدوات الموضوع انواع عرض الموضوع
 
قديم منذ /05-16-2012, 11:42 AM   #1

محمد حسام
مشرف

محمد حسام غير متواجد حالياً

 رقم العضوية : 221
 تاريخ التسجيل : Feb 2012
 المكان : مصر
 المشاركات : 828
 النقاط : محمد حسام is on a distinguished road
 تقييم المستوى : 16
 قوة التقييم : 13

Thanks: 590
Thanked 777 Times in 496 Posts
افتراضي بعض انواع اسماك البحر المتوسط وطرق صيدها

 

سمكة المياس
البيئة الطبيعية :
سمكة بحرية جوالة أو مهاجرة تعيش في البحار و المحيطات في المناطق الإستوائية و المدارية على عمق حتى 200 متر
تعتبر سمكة هامة في رياضة صيد الأسماك و يتم صيدها بواسطة الطعوم الحية و الصناعية .
تتواجد في المياه الإستوائية و المدارية في المحيطات بإستثناء شرق المحيط الهادي في شرق الأطلنطي تتواجد من سواحل البرتغال إلى جنوب أفريقيا مرورا بالبحرالأبيض المتوسط و البحر الأسود و جزر ماديرا و الكناري و في غرب المحيط الأطلنطي من كندا و برمودة حتى سواحل الأرجنتين , وفي المحيط الهندي على طول الساحل الأفريقي الشرقي و مدغشقر و جنوب عمان و جنوب غرب الهند إلى خليج مالاي و غرب أستراليا , وفي جنوب غرب المحيط الهادي و أستراليا ما عدا المناطق الشمالية و نيوزيلاندا , لا تتواجد في شرق و شمال غرب المحيط الهادي .
تتواجد في المحيطات و البحار و المياه الساحلية و شائعة في مياه الشواطيء و رؤوس السواحل الصخرية و المياه النقية ذات التيارات القوية و النشطة و تتواجد أيضا في المياه الرائقة بطيئة الجريان المياه الضحلة الساحلية على عمق 2 متر على الأقل تتجمع في أسراب تطارد الأسماك الصغيرة و خاصة تجمعات البوري أو السردين , و هي تدمر أعداد كبيرة من أسماك هذه الأسراب أكثر من حاجتها للطعام , و تتغذى على الأسماك و القشريات و السبيط و الكاليماري و تشارك أسماك القرش و المفترسات الأخرى في التواجد .
سمكة مفترسة و عدائية جدا وهناك تقارير تفيد بأنها تعض عندما يتعامل معها في بيئتها الطبيعية , وهى متجولة في أغلب اطوار حياتها و تهاجر للمياه الدافئة في الشتاء و المياه الباردة في الصيف .
تعتبرسمكة جيدة لهواة رياضة صيد الأسماك نظرا لأنها سمكة مقاتلة , سمكة طيبة للأكل
موسم الصيد:
يتواجد المياس طوال العام و لكن يكثر فى فصلي الربيع و الصيف .

أنسب اوقات للصيد:
من العصر لغاية بعد غروب الشمس بساعة تقريبا , ومن قبل الفجر بساعة لغاية شروق الشمس

طرق صيد :
هناك طريقتين لصيد المياس :-
1- و يتم الصيد من القارب و ذالك باستخدام غزل الصنار وهذا يتكون من شعر رقم 100 او 120 وطولة ممكن 200 او 250 متر, و يتم ربط كل 2 او 3 متر صنارة كبيرة في سلك , وبين كل صنارة والثانية رصاصة ( ثقيل ) ويطعم في كل صنارة سردينة كاملة او نص سردينة ويفرد الشعر في الماء و يترك من الليل الى الصباح .
2- باستخدام البوصةو الماكينة
الشعر المستخدم رقم 40 او 50 بوصة الصيد تكون من نوع ممتاز تتميزبالصلابة , و يتم استخدام صناررقم 1 او 2 باستخدام سلك صلب مخصص لصيد الاسماك ذات الاسنان القوية ,الرصاص متوسط الوزن .
الطعم المستخدم :
الاسماك الصغيرة و يفضل السردين – المرمار–الموزه
انواع اسماك البحر المتوسط وطرق
البوري
البورى من انوع السمك التى تعيش فى مجموعات كبيرة و يطلق بعض الصيادين على البورى حسب حجمة اسماء منها البوري
الصغير: جران المتوسط: بوري الكبير: كمبوت
غير طبعا اسماء كتير زى جعبوب – طوباره – اصفر ودن
و ينتسب له 10 اجناس و حوالى 100 نوع سمك
يتواجد البورى عادة في المياة متوسطة العمق يعني من 3 ل 6 متر تقريبا و بيعيش فى المياه المالحه و العذبه
موسم صيد البوري : يتواجد البورى طوال العام و لكنة بيقل جدا في الصيف والشتاء يعني لما المية تسخن قوي ولما تبرد قوي
طرق صيد البوري
البوري عادة بنصطاده بالبوصة العادية وده بيكون بطريقتين
1- الصيد بالفلة
البورى من الاسماك الحساسة جدا علشان كده لازم نختار وقت الصيد وعدة الصيد المناسبة صيد البوري يكون بهدوء شديد ولو بتصطاد بالنهار لازم تختار مكان لا ينعكس الظل المترتب عن خيالك على المية يعني لا تجعل الشمس في ضهرك علشان ظلك مايجيش على المية
الشعر الاساسي مش اكتر من 25
شعرالارمه من 12 ل 20
السلاح 10-11-12
صيد البوري بالفلة يكون طعمك عجينة ومش اي عجينة لازم تكون طرية .
بالنسبة لشعرالارمه بيكون قصير يعني فرع 25 سم والتاني 20 سم
العمق اللي بتصطاد علية يكون نص عمق المية
اطعم العجينة وارمي.. خطاء يرتكبة جميع الصيدين احنا قلنا ان البوري حساس جدا لاي حركة غريبه لو انت رميت زي ما بترمي يبقى مش حتلاقي ولاسمكة بورى في المية يبقى احنا لازم ننزل الفلة بالراحة في المية و توكل على الله .
البوري مش بياكل زي باقي السمك البوري فيه ناس بيقولو انه بيلحس الطعم وده طبعا مش صحيح لانه بياكل ولكن لان بقه فتحته لفوق وبقه صغير جدا فبيسحب من الطعم حتت صغيرة جدا وعلشان كده لما بياكل بنلاقي ان الفلة مش بتغمز
بنلاقي ان الفلة بتتحرك حركة بسيطة احنا بنقول انه بيخنق الفلة لما السمكة تاكل معاك اوعى ترد فيها جامد وده لسببين اولا لاننا قلنا ان اي حركة غريبة حتخلي السمكة تفزع وثانيا لان بق البوري ضعيف لو اديتة واحدة جامده شوية حتلاقي بقة بس هو اللي طالع وطبعا لو السمكه كبيره حيتقطع الشعر علشان بنستخدم شعر رفيع .
2- صيد البوري بالربع (المشنقة)
شعر اساسي 25
شعر الارمه 15 ل 20
الصيد بدون فلة
الشعر الاساسي طولة نص عمق المية
السلاح كبير شوية يعني 6 او 5
وبيكون عدد من 5 ل 7 سنانير بنعمل 3 طولهم حوالي 10 سم والباقي طولهم حوالي 5 سم , ونحط رصاص شريط حوالين مكان توصيل السنانير ,الصيد بيكون بعجينة ناشفة , بتحط العجينة على الرصاص وبتنزلها المية بالراحة لغاية ما اللبلوب بتاع البوصة يوصل اول المية في الطريقة دي البوري هو الي بيوقع نفسة وعلشان كده سموها المشنقة. وممكن نستخدم طعم تاني مع الطريقة دي وهو السردين تشيل راس السردينة وتفتحها من بطنها وتعلقها على السناير يعني تخلي السنانير كلها جوة بطن السردينة وتغرزها فيها من جوة .
صيد البوري بالبوصة والماكينة (السندويتش)
الشعر الاساسي 40
شعر الارمه 30 او 35 وده لازم لان السمك اللي بيضرب عليك سمك تقيل
السلاح بيكون حوالي 6 او 7
بنربط 10 او 15 سناره كلها متواليه فى شعر حوالى متر و نصف وبتكون الرصاصه متوسطه الوزن و حره يعنى مش بنثبتها ونجيب قطعة فل حوالى 15 سم فى 10 سم و عيش بلدى بس نقلب الرغيف بحيث يكون الجزء الداخلى هو اللى بره ونلف العيش على الفله ونلف الشعر بالسنار على العيش بحيث يكون السنار موزع على جميع اجزاء العيش ونجيب استيك عادي من بتاع الفلوس علشان يثبتهم كلهم مع بعض .
لما بترمى بالماكينه علشان الرصاصه حره بتنزل و تثبت على الارض و يطفو العيش على سطح و ما يتحركش مع تيار المياه و لما السمك بيحاول ياكل العيش بيشبك نفسه فى السنار .

طريقة تحضيرالعجينة لصيد البوري :-
اولا العجينة الطرية
كوب دقيق – مية حسب الاحتياج - سكر
يخلط الدقيق مع الماء و كميه صغيره من السكر و يقلب جدا حتى يصبح القوام متمكاسك و يرفع على النار ونقلبة لغاية بقى متماسك بيبقى قوامها عامل زي قوام الشحم اللي بنشحم بيه .
سيبها تبرد وحطها في علبة بس لازم لاحظ ان تطعيم العجينة الطرية عايز خبرة لانك لازم تطعمها بفمك بمعنى انك بتاخد حتة عجينة صغيرة على السنارة في فمك وتلف العجينة على السنارة بلسانك فالغلطة حتلاقي انك اصطدت نفسك .
ثانيا العجينة الناشفة
ودي بتكون للصيد بالربع وهي عبارة عن عيش بلدي عادي جدا وبنبلة ونعجنة بادينا ونسيبة جنبنا في الشمس او الهوا ولو احتاج مية تاني نديلة وده تطعيمة ساهل جدا لانك بتاخد حتة وتحط الرصاصة في نصها وتلف العجينة عليها بايدك و تضغط عليها زي ما تكون بتعمل كفتة .
لصيد البوري يجب ان تنفذ بعض الاجراءات وهى تحضير المرمى , وهو انك لازم تجمع السمكة الاول وده بيكون بالتزفير ,والتزفير بيكون بعيش مبلول في جردل مية لغاية ما يفرول وتعملة كور صغيرة وترمية في المية ,والتزفير للبوري شئ اساسي لان البوري بيتجمع على ريحة العيش في المية وكمان لازم تلاحظ ان مع كل سمكة تطلعها لازم ترميلك كورة او اتنين تزفر بيهم علشان تثبت السمكة تحت منك التزفير بيكون قبل ما تبتدي تصطاد بفترة ممكن توصل ساعتين ويكون متواصل علشان تقدر تجمع اكبر كمية من البوري .
انواع اسماك البحر المتوسط وطرق
الدنيس
انواع اسماك البحر المتوسط وطرق
سمكة “الدنيس” التى يعرف قيمتها جيداً والصيادون وتجار الأسماك ومتذوقوها..!!
غنى بالأملاح المعدنية والفيتامينات والكالسيوم والفسفور..
فى المياه الساحلية والبحيرات الضحلة تعيش سمكة الدنيس حياتها.. قيمتها المرتفعة.. وندرة وجودها.. أهم أسباب ارتفاع أسعارها.. لكن عشاقها من الآكلين.. مما يدفع عشاقها من الصيادين إلى متابعتها والصبر عليها للوصول إليها.. حيث أنها تفضل العيش فى المياه المالحة بالقرب من مصبات الأنهار..
الدنيس سمك موجود فى البحر المتوسط طوال العام تقريباَ فى شواطئ الاسكندرية من الطرح حتى مرسى مطروح ، والدنيس يوجد بمحموعات لاتقل عن ثلاث سمكات تعوم ببطء فى قاع البحر بحثا عن الديدان والقواقع والجراية الصيفى ( الكابوريا ) والاحياء ويعتمد على قوة اسنانة وادراسة القوية ولدية القدرة على طحن قوقعة صدفية ويلتهم ما بداخلها من احياء
موسم سمك الدنيس من منتصف شهر اكتوبر الى اخر شهر فبراير , ولكن افضل وقت لسمك الدنيس هو من ديسمبر الى يناير .
و بعض الصيادين يطلقون على سمك الدنيس الصغير اسم ( فلّيجس ) والكبير دنيس , و هناك نوع اخر يطلق علية الصيادين الملك و هو يتميز بوجود نقطة (لطشة ) صفراء على خياشيمة .
اماكن تواجد الدنيس :
سمك الدنيس بيحب الوعر وبيعيش حواليه في مجموعات ,وبيحب برضه الارض الخشنة , يعني لو المكان اللي بترمي فيه مفيش فيه وعر ورملته خشنة (حصى) حتلاقي الدنيس موجود وزي ما قلنا انه بيعيش في مجموعات ودايما بيتحرك في المنطقة في شكل دواير علشان يدور على الاكل ولو اخذت منه واحده وغاب عليك بعد كده متقلقش حيلف ويجيلك تاني ان شاء الله .
لأدوات اللازمة لصيد الدنيس :
ماكينة او بوصة يد الشعر من رقم40 الى 45 والسنار من رقم 3 الى رقم 6 رصاص متوسط
طريقة الربط :ـ بما ان الدنيس موجود فى قاع البحر يربط السنار اسفل الرصاصة وتكون الرصاصة دائما حرة
الطعم فى الصيف :ـ
النطاط ـ الجلاجلة ـ الجراية ـ سرطان البحر الصيفى- الدود الاسمعلاوى للدنيس الموجود على الصخور والطعم الطازج الجامد عامة حرصاَ من تدخل السمك الرفيع
الطعم فى الشتاء :ـ
جمبرى العقر او البلنص ـ الجندفلى ـ الديدان ـ شرائح السردينيلا
طريقة الرمى والصيد :ـ
الرمى فى أماكن الوعر ، وعندما تأكل السمكة لاتشد الشعر وأنما أعطيها بوش من الشعر حتى ياخد الامان و يبلع الطعم كى لاتشلح وتترك السنارة واذا كانت السمكة كبيرة لاتتعجل فى اخراجها حتى ترهقها وتخرجها بالهدوء حرصا على سلامة البوصة والشعر والسمكة ويستحسن ان ترمى فى نفس المكان ولما تلاقى مقاومة من السمكة وقف ايدك شوية لغاية ما يبتدي يعافر وبعدين ابداء فى لم الشعر مرة اخرى .
1- بالبوصة الماكينة
الشعر الاساسي 40 –الارمه 35 او 30
السلاح(السنارة) لو فيه فليجس في البحر يبقى السلاح نمرة 5 او 4 او 3 بالكتير , ويفضل سنارة بكرش ,ولو بترمي على السمك الكبير يبقى السلاح نمرة 1 او 2 او 3 .
1- ان تكون الارمة مشابهة للارمة على بوصة اليد ولكن اقصر (مثلا 30 سم و45 سم)وتكون تحت الرصاصة .
2-ان يكون السلاحين فوق الرصاصة ولكن على طريقة السبحة بمعنى ان يكون السلاح الاول فوق الرصاصة ويليه السلاح الثانى واطوال الاسلحة ايضا من 25 الى 35 سم
طريقة الربط :ـ بما ان الدنيس موجود فى قاع البحر يربط السنار اسفل الرصاصة وتكون الرصاصة دائما حرة
2- البوصة العادية (بوصة اليد)
وفيها طريقتين :-
أ – الحساس
وهو نفس الصيد بالماكينة بس بالبوصة العادية
ب -الصيد بالفلة وده لازم يكون على عمق , لان الدنيس دايما فى القاع
وبتعمل الشعر الاساسي 35
والارمه 30 او 25
السلاح لا يقل عن نمرة 6
والفروع بتعمل فرع متر وربع والتاني متر
القاروس
يسمى أحياناً بالقاروس الأوربي لتمييزه عن أنواع أخرى مشابهة من نفس الجنس أو من جنس مختلف. تسمية "Dicentrarchus" تعني ثنائي الشوكة، وذلك لوجود شوكتين قاسيتين في الزعنفة الظهرية لأنواع هذا الجنس.وفى منه حوالى 10 انواع منها اللى بيعيش فى المياه العذبه
القاروس الأوربي يعيش في البحر المتوسط والبحر الأسود والشواطئ الأوربية من المحيط الأطلسي. لونه يميل للفضي على الجانبين بينما بطنه لونها أبيض.. تنمو هذه السمكة لتصل إلى اقصى حجم مسجل 103 سم و 12 كيلو جرام .
فى السواحل المصريه بيحب يتواجد عند مصبات الانهار مثلا نلاقيه فى دمياط و رشيد و المعديه و الطرح لانه بيحب المياه الدافئه و الاقل ملوحه و المناطق الرمليه الضحله لانه من الاسماك التى تتغذى على الاسماك الصغيره و القشريات و الديدان علشان كده دايما فى الساحل الشمالى نلاقيه موجود قريب من الشط وبيظهر فى الليل لانه بيحب الضوء الخافت مثلا فى مارينا تلاقيه بكميات كبير ه عند الكبارى المضيئه فى البحيرات و ممكن يقرب من الشط حتى عمق 30 سم

اوقات الصيد :
فى الصباح و بعد الغروب و منتصف الليل

متواجد طوال السنه بس بيكون اكتر من نهاية شهر سبتمبر حتى اكتوبر و من شهر يناير حتى مارس

انواع الطعم:
الجمبرى - السردين - البساريا و الدود الاسمعلاوى و القراص
الطعم الصناعى ( الريشه و المعلقه )

طرق الصيد :
ممكن تصطاده زى اى نوع سمك بالبوصه او الماكينه

لو حنستخدم البوصه تكون مش اقل من 7 متر و الشعر الاساسى 35 و الارمه بشعر 25 او 30 الفروع 1.25 سم و 1.00 سم وسنار مش اقل من مقاس 5

لو حنستخدم الماكينه فى عدة طرق:
1- التجريه بالمعلقه او الريشه ( المخيله )
2- بالفله و بتبقى الفله كبيره و الرصاص متوازن مع حجم الفله و الارمه زى ارمة البوصه
3- لو فى مياه ضحله يبقى الرصاصه متوسطة و حره و الارمه زى ارمة البوصه

وفى ناس كتير بتقول ان النقط هو صغير القاروس و دى معلومه مش صحيحه النقط سمكه من نفس الفصيله اسمها العالمى Spotted Seabass واقصى حجم مسجل 73 سم
انواع اسماك البحر المتوسط وطرق
البطاطا
انواع اسماك البحر المتوسط وطرق
سمكة البطاطا وهي من اسماك البحر الاحمر والخليج وعبرت للبحر المتوسط من قناة السويس زمان على ما اتذكر ان الموسم بتاع البطاطا كان اول يوليو لغاية اخر اغسطس بس دلوقتي موجوده طول السنة موسم التفريخ بيكون في بداية ابريل وهي سمكة نهارية يعني مش موجوده بالليل .
الطعم المفضل
اولا : العجين سواء عجينة عيش او دقيق المهم انها تكون عجينة ناشفة .
ثانيا : الجمبري (البرغوت) .
ثالثا : الخضرة الشعر (النسيله ) .
طريقة الصيد
صيد البطاطا بيكون بالبوصة اليد مش الماكينة
فيه كذا طريقة لصيد البطاطا بالبوصة
اولا بالفلة او الغماز
الشعر الاساسي يكون نمرة 25 , والارمه بشعر 20 او 18 ومعروف عن البطاطا انها سمكة قوية وخصوصا الاحجام الكبيرة .
السلاح او السنارة نوعين
اما السنارة العادية وتكون نمرة 10 او 11 او 12
او الشلاليط وهي سلاح من 3 سنانير ملحومين في بعض زي الهلب , المهم الارمه تكون قصيرة يعني بالكتير 20 سم , الفلة صغيرة والرصاص او التقل خفيف
العيار (ارتفاع الفلة عن الرصاص ) يكون حوالي ثلثين ارتفاع المية عن الارض
مع الوقت وخبرتك في المكان حتعرف المية عمقها قد ايه
حط العجينة وارمي
اول ما الفلة تغمز نص غمزة الطشها وادعيلي
ثانيا الصيد من غير فلة (حساس)
وهو نوعين
طريقة اسمها الربع او المشنقة
وهي طريقة مش كل الناس بتقبل عليها لانها متعبة شوية
الشعر زي ما اتفقنا 25 , طول الشعر حوالي ثلثين عمق المية , يعني لو بترمي على قرار 3 متر يكون طول الشعر 2 متر , ويفضل استخدام بوصة قصيرة نوعا يعني 4 او 5 متر , السلاح مكون من 6 او 7 سنانير , كلهم نفس الطول اللي هو حوالي 5 سم تحت الرصاصة , ما عدا 2 منهم بيكون طولهم 10 سم , حجم السنانير يكون كبير مثلا نمرة 7 او 6 , الرصاص شريط وثقيل يعني لف ثلاث او اربع لفات كده , حط العجينة الناشفه على الرصاصة ونزلها المية حتلاقي السمك بتشدك ,الطريقة دي بنستخدمها للبوري برضة
الطريقة الثانية في الحساس هي السبحة
وسموها السبحة لان عدد السنانير بيكون كتير وفوق بعض زي شكل السبحة , ودي بيكون فيها طول الشعر زي طول البوصة , نحط رصاصة بلحة نمرة 1 في اخر الشعر من تحت , وفوق الرصاصة نربط من 4 ل 8 سنارة , الفروع طولها حوالي 10 سم , حط عجينة او جمبري ونزلها المية , حتلاقي السمك بتشدك برضه .
و احذروا من شوكه البطاطا مؤلمه جدا يعنى حاول تمسكها بقطعة قماش
دلوقتي نيجي لافضل اماكن تلاقي فيها البطاطا
حتلاقيها في البحر في اي مكان بس فيه اماكن مشهورة بالاسكندرية بالاحجام الكبيرة
السلسلة – كليوباترا – سيدي جابر – لسان جليم الثاني – سان ستيفانو – امام المحروسة – المنتزة – مارينا – جزيرة نيلسون

الوقار
انواع اسماك البحر المتوسط وطرق
او الهامور زى ما بيسموه فى الخليج هو من الأسماك المرغوبة جداً ، هو يتميز بلحمه الشهي والطري والدهني فهو غني بالأحماض الدهنية وأوميجا3 وهي أحماض غير مشبعة لها دور هام للمحافظة على صحة الإنسان ووقايته من الأمراض من بعض فوائد (أوميجا3) أنها تساعد في تكوين أنسجة المخ والقرنية والعين ، ولها تأثيرات مضادة للالتهابات ، وتخفف آلام المفاصل، وتقوي الذاكرة ، كما وتخفض من احتمال الإصابة بأمراض القلب.
و الغريب في الوقار أنه كلما كبر وزاد وزنه كان لحمه أفضل .. و اكبر حجم تم صيدة يزن 50 كيلو جرام .
وبالنسبة لبيئتها البحرية فإنها تنتشر في أنحاء الخليج والبحر الأحمر و البحر المتوسط ، وتعيش في الأماكن الضحلة القريب ة من السواحل ، وكذلك في الأماكن العميقة بين الشعاب المرجانية والصخور الضخمة ، وتبني بيوتها بمفردها من خلال حفر الرمل بين الصخور وأسفلها .
ويمكن اصطيادها بكل أساليب ووسائل الصيد المختلفة من تقليدية وحديثة ، فهي سهلة الصيد ، وهذا ما يفسر تواجدها المستمر في سوق السمك على مدار العام وليس لها موسم محدد ، ويساعد على ذلك كونها من الأسماك التي تنتج بيوضاً كثيرة تطفو فوق سطح الماء .. عند صيد سمك الوقار يراعى رفعة بسرعة لأن سمك يجيد الأختباء بين الصخور وكثير ما يُعتقد انه يدخل بين الصخور ينفخ جسمة حتي يتشبث بها وينقطع الخيط و الحقيقة ان الوقار يلف جسمة بين الصخور ويبدء في تحريك رأسة بها و بالتالى يحك الشعر في الصخور حتى يقطع.
ومن طرائف صيد الوقار أن هناك ظاهرة نادرة تقوم بها سمكة الوقار وهي أنها إذا ما أرادت أن تفرغ الغازات التي داخل جسمها فإنها تقوم بقلب نفسها على صفحة الماء فتكون في شبه غيبوبة، ويمكن في تلك الأثناء الإمساك بها بسهولة ، واصطيادها دون عناء .
و على فكره اصطدت وقاره من حوالى 3 سنين من الطرح بنفس الطريقه و كان وزنها 16 كيلو
وهي سمكة قوية تتحمل الظروف البيئية القاسية : كارتفاع درجة حرارة المياه الضحلة ، أو البرودة الشديدة ، وعند تكدر صفاء ماء البحر، وقلة الأوكسجين ، وتبقى على قيد الحياة بعد اخرجها من الماء لمدة تصل إلى أكثر الساعة ، كما أنها سمكة لا تشبع من تناول الطعام ، إذ تتسع معدتها بأن تتناول نصف حجمها من الطعام



التعديل الأخير تم بواسطة محمد حسام ; 05-16-2012 الساعة 01:58 PM
  رد مع اقتباس
The Following User Says Thank You to محمد حسام For This Useful Post:
bodygard 34 (03-07-2014)
 
قديم منذ /05-16-2012, 11:24 PM   #2

ahmed.76
صياد نشيط

ahmed.76 غير متواجد حالياً

 رقم العضوية : 129
 تاريخ التسجيل : Jan 2012
 المشاركات : 182
 النقاط : ahmed.76 is on a distinguished road
 تقييم المستوى : 10
 قوة التقييم : 13

Thanks: 551
Thanked 225 Times in 139 Posts
افتراضي رد: بعض انواع اسماك البحر المتوسط وطرق صيدها

 

تسلم ايدك يا استاذ محمد موضوع مفيد


  رد مع اقتباس
The Following User Says Thank You to ahmed.76 For This Useful Post:
محمد حسام (05-17-2012)
 
قديم منذ /03-05-2014, 04:31 PM   #3

YOUSSEF
صياد جديد

YOUSSEF غير متواجد حالياً

 رقم العضوية : 4863
 تاريخ التسجيل : Mar 2014
 المشاركات : 26
 النقاط : YOUSSEF is on a distinguished road
 تقييم المستوى : 10
 قوة التقييم : 0

Thanks: 0
Thanked 5 Times in 5 Posts
افتراضي رد: بعض انواع اسماك البحر المتوسط وطرق صيدها

 

شكرا جزيلا


  رد مع اقتباس
 
قديم منذ /03-05-2014, 10:19 PM   #4

madku99
صياد جديد

madku99 غير متواجد حالياً

 رقم العضوية : 4866
 تاريخ التسجيل : Mar 2014
 المشاركات : 1
 النقاط : madku99 is on a distinguished road
 تقييم المستوى : 10
 قوة التقييم : 0

Thanks: 0
Thanked 0 Times in 0 Posts
افتراضي رد: بعض انواع اسماك البحر المتوسط وطرق صيدها

 

http://atravian.com/ts2/register.php?ref=68


  رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 01:23 AM


Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
Ads Management Version 3.0.1 by Saeed Al-Atwi



أقسام المنتدى

الأقــســـام الــعـــامــة @ الصيد العام @ قسم الأسلحة @ أسلحة ضغط الهواء @ السلاح الحي والخرطوش @ أسلحة الصوت ( محدثات الصوت ) @ الورشه والصيانه @ الصيد وانواعه والرحلات @ رحلات الصيد بالصور @ الصيد البري @ المطبخ @ قسم السوق @ بيع وشراء الاسلحه الهوائيه و مستلزماتها @ بيع وشراء مسدسات الصوت ومستلزماتها ( محدثات الصوت ) @ السوق العام @ الإدارة @ استراحة الصيادين والهواة @ العياده @ الصيد البحري والنهري @ بيع وشراء ادوات صيد السمك @ مجلة صيادين مصر @ حيوانات و طيور الصيد @ منتدي السيارات @ شخصية العدد @ تاريخ الصيد والرمايه والاسلحه @ منتدى هواة تربية الطيور والأسماك والحيوانات الأليفة @ قسم هواة الحمام واليمام @ قسم هواة الصقور والطيور البرية @ قسم هواة الببغاوات وطيور الزينه @ قسم هواة اسماك المياه العذبة @ قسم هواة اسماك المياه المالحة @ قسم هواة الكلاب @ قسم هواة القطط @ مقترحات تطوير المنتدى @ المحذوفات والموضوعات المكررة @ منتدى هواة تربية الطيور والاسماك والحيوانات الأليفة @ سوق سيارات منتدى صيادين مصر @ بيع وشراء السلاح الحي و بنادق الخرطوش المرخصة @ الاعلان عن رحلات الصيد البحري وطلعات الصيد البري @